Орусияга Орто Азиядагы өлкөлөрдөн иштөөгө келген жарандар кармалды

Орусияга Орто Азиядагы республикалардан келген жарандар "террорчулукка көмөк көрсөтүү" боюнча айыпталып кармалышты. Бул тууралуу Орусиянын Тергөө комитетинин басма сөз кызматы билдирди.

Маалыматка ылайык, бүгүн, 5-апрелде Орусиянын Коопсуздук кызматынын, Ички иштер министрлигинин жана Улуттук Гвардиясынын кызматкерлери Орто Азиядагы республикалардан Орусияга иштөөгө келген 6 жаранды кармашты. "Тергөөнүн версиясы боюнча, кылмышка шектүүлөр 2015-жылдын ноябрь айынан тарта бүгүнкү күнгө чейин Санкт-Петербургда Орто Азиядагы өлкөлөрдөн келгендерди "Джебхат ан-Нусра", "Ислам мамлекети" террордук уюмдарга кирүүгө үндөшкөн. Мындан тышкары алар чет өлкөлөрдө мыйзамсыз куралдуу түзүмдөрдү түзүүгө ниеттенишкен. Учурда кармалгандардын жашаган жерлеринде издөө иштери жүргүзүлүп, экстремисттик китептер, документтер алынууда. Азыркы тапта кармалган 6 жарандын Санкт-Петербургдагы метродо жардыруунун аткаруучусу менен байланышы бар же жоктугу тууралуу маалыматтар жок", - деп билдирет Орусиянын Тергөө комитети.

Айта кетсек, жардыруу 3-апрель күнү жергиликтүү убакыт боюнча саат 14:30 чамасында (Бишкек убактысы боюнча 17:30) Санкт-Петербургдагы метродо болгон. Анын кесепетинен 14 адам каза болуп, 49 адам ар кандай деңгээлдеги жаракаттарды алышкан. Метродо болгон жардырууга Кыргыз Республикасында туулган, өзбек улутундагы Орусиянын жараны, 1995-жылы туулган Жалилов Акбаржон Акрамжанович шектелүүдө. Анын ата-энеси Ош шаарындагы кичи райондордун биринде жашаары белгилүү болгон. Ал 2011-жылы ата-энеси менен бирге Орусияга барып, ошол жакта калып калган.