Кыргыз окумуштуулары төө буурчак тазалоочу комбайндын конструкциясын иштеп чыгышты

Кыргыз окумуштуулары төө буурчак тазалоочу комбайндын конструкциясын иштеп чыгышты. Бул тууралуу 5-апрелде Улуттук илимдер академиясынын басма сөз кызматы билдирди.

Маалыматка караганда комбайнды келечекте айыл-чарбасында колдонууга өткөрүп берүү пландары бар. Азырынча түзүлүштүн конструкциясы текшерүүлөрдөн өтүүгө тийиш, иштелме 2016-жылдын аягында соңуна чыккан.

Машина таануу институтунун директорунун милдетин аткаруучу Мурат Жуматаев аталган түзүлүш ишке киргизилсе, дан эгиндерин тазалоочу кадимки комбайн сыяктуу эле функцияны аткарарын айтты.

"Мындай механизм буга чейин айыл чарбасында колго жасалып, колдонулуп жүрүшү ыктымал. Бирок заводдун шартында жасала элек болчу. Ал эгер колдонууга бериле турган болсо, буурчакты кабыгынан тазалоодо колго жасалуучу ишти талап кылбайт", - деди Жуматаев.

Төө буурчак тазалоочу транспортёрдук түзүлүштү техника илимдеринин доктору, академик Мурат Жуматаев, техника илимдеринин доктору, профессор Мыйманбай Алмаматов, техника илимдеринин кандидаты, улук илимий кызматкери Алтынбек Баялиев, инженер Мирбек Байгазиев жана лаборант Дамирбек Байгазиевдер иштеп чыгышкан.