Германияда 16 жаштагы кыз кайчыдан коркуп 3 жылдан бери тырмагын өстүрүп келет

16 жаштагы Симона Тейлор аттуу германиялык кыз 2014-жылдан бери тырмагын ала элек. Азыр тырмактарынын узундугу 14 сантиметрден ашкан. Мындай маалыматты бүгүн, 6-апрелде чет элдик басылмалар жазып чыгышты.

Маалыматка караганда өспүрүм кыз мындан 3 жыл мурун маникюр жасаганда колдонулчу шаймандардан коркуп калган. Ошол мезгилден баштап тырмагын алган эмес. Окуучунун айтымында, тырмактары ага көп жерден ыңгайсыздык жаратат, бирок ал сулуулук үчүн баарына чыдайт. Ошондой эле тырмагын өстүрүүгө интернеттеги "Узун тырмактарга кантип кам көрүү керек?" деген видео дагы түрткү болгон. Өзгөчө тырмактары менен бардык үй жумуштарын жасаганга үйрөнүп калганын айткан.

"Жазып бүткөндөн кийин колдорум катуу ооруйт. Чачымды жууп жатканда дагы ыңгайсыздык жаралат. Буга чейин бир гана жолу дарбазадан ашып түшөйүн деп жатканда тырмагымды сындырып алгам", - дейт ал.

Дене тарбия сабагына катыша албагандыктан мугалимдери Тейлорго дайыма тырмагын алып салуусун айтышат, бирок ал өзүнүкүн бербей келет.