Депутат Айтмамат Назаров: “Айыл мыйзамы” ысырапкорчулукка чек коёт"

“Айыл мыйзамы” каада-салттарды, материалдык-каржылык чыгымдарды жөнгө салууну көздөйт", - деп 6-апрелде "Кыргызстан" фракциясынын депутаты Айтмамат Назаров “Парламент” радиосуна берген маегинде билдирди.

Ал билдиргендей, анда ысырапкорчулукка чек коюу талабы камтылган. "Алгач мындай демилгени айыл аймактарынан баштоо аракети көрүлүүдө. Аны сыноо долбоору катары Сузак районундагы Кыз-Көл айыл аймагында ишке ашып жатат. Ыгы жок салт-санаа менен өткөн той-аштарга деп жылына 2 миллиард доллардан ашык каражат жумшалат", - деди ал.

Депутат атайын комиссия түзүү керек экенин белгилеп, курамына сөзү өтүмдүү, кадыр-барктуу деген кишилер сунуштала турганын айтты. Ошондой эле маркумду акыркы жайга узатууда жыртыш таратуу, 3, 7 40 күндүк, жылдык деген эскерүү иш-чараларын колдонбоо маселелери дагы “Айыл мыйзамында” белгиленгенин билдирди.