ЖЫЛНААМА, 7-АПРЕЛЬ: Атактуу франциялык футболчу Франк Рибери 34 жашка толду

Атактуу франциялык футболчу, Франция курама командасынын жана "Бавария" (Германия) футбол клубунун жарым коргоочусу Франк Рибери 34 жашка чыкты. Ал 1983-жылы 7-апрелде Франциянын батышындагы Булонь-Сюр-Мер деп аталган жарды аймакта жумушчунун үй-бүлөсүндө туулуп-өскөн. Атасы канализацияларды оңдоочу болуп иштеген. Ал 4 бир туугандын эң улуусу болгондуктан, ата-энесине жардамдашып кичинелерди кароо анын моюнунда эле. Андыктан бала чагында бактылуу күндөрү дээрлик болгон эмес. Футбол ойногон учурларда гана ал бардык кыйынчылыктарды унутуп, өзүн бактылуу сезгени айтылат.

Футболчу карьерасында көптөгөн кыйынчылыктардан өтүп, франциялык "Булонь", "Олимпик", "Брест", "Мец" клубдарында, түркиялык "Галатасарайда" ойногон. Анын бактысы мюнхендик "Баварияда" ачылып, чыгаан футболчулардын катарына кошула алган.

Дал ушул клубда ойноо менен ал Европадагы эң ири футболдук лига - Чемпиондор Лигасын уткан. Бир нече жолу Германиянын чемпиону аталган. 2013-жылы УЕФАнын версиясы боюнча "Европанын мыкты футболчусу" болуп табылган. 2016-жылдын жыйынтыгы менен анын ФИФАнын версиясы боюнча "Дүйнөнүн мыкты футболчусу" аталуу мүмкүнчүлүгү бар эле. Бирок Месси - Роналду атаандаштыгы Риберини "борт" тышында калтырган.

Ал Франциянын улуттук курама командасына чакыруу алып, 23 жашында майданга атактуу Зинедин Зидандын ордуна чыккан. Зидандын сөз болуп жаткан Рибериге көп кеп-кеңеш бергени белгилүү. Атүгүл анын ислам динин кабыл алуусуна себепчи болгон 2 адамдын бири Зидан экенин Рибери журналисттер менен курган маектеринде айтып жүрөт. Экинчи себепчи - алжирлик Вахиба Бельхами аттуу айым. Сүйүүсү үчүн баарына даяр болгон Рибери Куранды окуп үйрөнүп, ислам динин кабыл алган. Анын мусулманча аты - Билал. Рибери исламды сүйгөнүнө үйлөнүш үчүн гана эмес, чын дилинен окуп түшүнгөндүгү үчүн да кабыл алган.

7-апрелге карата жылнаама.