Чүй облусунда изделип жаткан 14 жана 11 жаштагы балдар Бишкектен табылды

Чүй облусунда изделип жаткан 14 жана 11 жаштагы балдар Бишкектен табылды. Бул тууралуу бүгүн, 8-апрелде Чүй облустук ички иштер башкы башкармалыгынан билдиришти.

Чүй ОИИББинин маалыматына караганда эки бала 7-апрель күнү кечинде Бишкектен табылган. Азыркы тапта алардын эмне себептен үйдөн качып кетишкени жана 5 күн кайда түнөшкөнү такталууда.

Айта кетсек, 4-апрель күнү милиция кызматкерлерине Москва районундагы Беловодское айылынын тургуну кайрылып, 2003-жылы туулган Куттубек уулу Ислам аттуу баласы жана сиңдисинин баласы 2006-жылы туулган Байболот Мырзабаевдин дайынсыз экенин айткан.

Арыздануучунун айтымында, 14 жаштагы баласы жана 11 жаштагы тууганы 2-апрель күнү саат 23:00 чамасында Беловодское айылындагы үйдөн чыгып кетишкен боюнча, кайра кайтып келишкен эмес.

Алар таенеси менен бирге турушчу. Биринин апасы Орусияда, экинчисиники Бишкекте иштечү.