2012-жылы Аида Салянова бараткан унааны токтоткону үчүн кызматтан кеткен инспекторго 48 айдын эмгек акысын төлөө боюнча соттун чечими чыкты

Үстүбүздөгү жылдын 23-март күнү Бишкек шаарынын Биринчи Май райондук соту 2012-жылы 7-августта мурдагы баш прокурор Аида Салянова бараткан унааны токтоткон инспектор Азамат Осмоновдун жазган арызы боюнча чечим чыгарды.

Доогердин арызында, мыйзамсыз кылмыш жоопкерчилигине тартылып, анын натыйжасында айлык алып үй-бүлөсүн баккан жумушунан айдалганын жазган. Ошондой эле ал моралдык зыяндын баасын 1 миллион сом деп баалаган.

"Ишти Биринчи Май райондук соту карап, доогердин укуктары бузулган деп тапкан. Мындан улам сот Финансы министрлигин Башкы прокуратурага бөлүнгөн акчадан доогерге 524 миң 880 сом төлөө чечимин чыгарган. Инспектор жумуштан бошогон учурда анын айлык маянасы 10 миң 935 сом болгон. Андан бери 48 ай жумушсуз жүргөн. Ал эми жетиштүү далилдин жоктугунан моралдык зыян үчүн 1 миллион сом төлөө өтүнүчү канааттандырылган эмес", - деп айтылат сот актысында.

Айта кетсек, 2012-жылы 7-августта Жол-патрулдук кызматынын кызматкерлери тарабынан терезелери караңгылатылган Лексус GX-470 үлгүсүндөгү унаа токтотулган. Бирок айдоочу баш бербей, унааны айдап кете берген. Патрулдук милициянын кызматкерлери артынан кууп, курал такап токтотууга аргасыз болушкан. Кийин унаанын ичинде ошол учурдагы баш прокурор Аида Салянованын бар болгону белгилүү болгон. Ошол эле жылы инспектор Азамат Осмоновго "кызматтык ыйгарым укуктарынан аша чабуу" беренеси боюнча кылмыш иши козголуп, Башкы прокуратуранын токтомунун негизинде Бишкек ШИИББинин Патрулдук-посттук кызматынын башчысынын буйругу менен кызматтан алынган. Бирок 2015-жылдын 14-майында Башкы прокуратуранын тергөө башкармалыгынын тергөөчүсү Осмоновго козголгон кылмыш ишинде, кылмыштын курамы жок деген негизде тергөөнү токтоткон.