Айлыктын аздыгынан улам Таласта маданият кызматкерлери иш ташташты

Талас шаардык мэриясынын алдындагы фольклордук оркестрдин кызматкерлери 10-апрелден тарта иш ташташты. Бул тууралуу бүгүн, 11-апрелде оркестрдин башкы дирижёру Тазабек Өмүркулов SUPER.KG порталына билдирди.

Тазабек Өмүркуловдун айтымында, бул оркестрди мындан 2 жыл мурун өзү түзгөн. 1 жыл иштегенден кийин 2016-жылдын март айында мэрия оркестрди өзүнүн карамагына алган.

"Менин музыкалык 3 дипломум бар. 47 жылдан бери маданият тармагында иштедим. Бул оркестрди өзүм түзүп, оркестрдин мүчөлөрүн көп нерсеге окуттум, үйрөттүм. Бул убакыт аралыгында эч кимден эч кандай акча алган жокмун. Биздин иштеп жүргөнүбүздү, өнөрүбүздү көрүп мэрия өзүнүн карамагына алган. Бирок 2000 сом айлык алабыз. Мэриядагылар "эптеп чыдап тургула, кийин көтөрөбүз" дешкен. Бирок дале ошол акчаны алабыз", - дейт ал. Ошондой эле бүгүн, мэрия бул маселе боюнча сүйлөшүүгө чакырганын кошумчалады.

Мекеме алдындагы фольклордук оркестр облустагы түрдүү маданий иш-чараларга катышат.