Санкт-Петербургдагы жардырууну уюштурууга шектелген Жалилов терактка чейин Түркиядан депортацияланган

Санкт-Петербургдагы жардырууну уюштурууга шектелген Акбаржон Жалилов аталган терактка чейин Түркиядан депортацияланган болчу. Бул тууралуу чет өлкөлүк басылмалар жазып чыгышты.

Маалыматтарга ылайык, Жалилов Түркияга 2015-жылы барган. Кийин ал "кара тизмеге" киргизилип, Түркияда бир нече убакыт мыйзамсыз жүргөн. "2016-жылдын декабрь айында ал бул өлкөдөн Анталия аркылуу кетейин дегенде, анын өлкөдө жүрүү мөөнөтү аяктаганына байланыштуу кармалган. Ага айып пул төлөө, же болбосо депортациялоо менен 5 жылга өлкөгө кирүүгө тыюу салуу сунушталган. Жалилов экинчи вариантты тандаган. Азырынча Жалиловдун Сирияга барган-барбаганы аныктала элек", - деп жазышат басылмалар..

Эскерте кетсек, 3-апрелде Санкт-Петербург шаарындагы "Сенная площадь" жана "Технологический институт" станцияларынын аралыгында жардыруу болуп, 14 адам каза болгон. Ал эми "Площадь восстания" станциясында калтырылган жарылуучу зат өз убагында табылып, жардыруу ишке ашпай калган. Тергөөнүн версиясы боюнча, терактты Кыргыз өлкөсүндө төрөлгөн Орусиянын жараны Акбаржон Жалилов жасаган.