Аялдардын зомбулукка кабылышына билимдин жетишсиздиги себеп болуп жатканы айтылды

Өлкөдө кыргыз тилдүү психологдор өтө аз экени бүгүн, 12-апрелде турмуштун оор кырдаалына кабылган аялдар менен балдарга жардам көрсөтүү боюнча тегерек столдо айтылды.

Иш-чарага мамлекеттик социалдык өнүгүү башкармалыктарынын жана бейөкмөт уюмдардын өкүлдөрү катышып, башынан оор турмуш өткөргөн аялдарга психологдун кеңеши маанилүү экенин белгилешти.

"Аялдардын зомбулукка кабылышына билимдин жетишсиздиги себеп болууда. Мындай кырдаалга туш болгондордун көбү мектепти аяктап эле турмушка чыккандар. Никеси катталбагандыктан, ажырашкандан кийин балдарына күйөөсүнөн жардам ала албайт жана жумуш табууда түйшөлүшөт. Негизинен базарда же кафелерде идиш жууп иштегенге мажбур болушат", - дейт реабилитациялык борбордун жетекчиси Светлана Баштовенко .

"Турмуштук оор кырдаалга кабылып, жардам сурагандардын 85 пайызы кыргыз тилдүүлөр. Тактап айтканда, орус тилин жакшы түшүнүшпөйт. Ал эми психологдордун 80 пайызы орус тилинде кеңеш берет. Психологдор эң аз дегенде бир саатка 300 сомдон 1000 сомго чейин акы алышат. Биздин өлкөдөгү психологдорго кыргыз тилин үйрөнүү мезгил талабы болуп турат", - деди Бүбүсара Рыскулова.