Индонезиялык кондитерлердин жомоктогудай торттору (фото)

Индонезиянын тургундары Сусанти Сунаржи жана Рики Рияди 2004-жылы торт жасоо боюнча үй-бүлөлүк бизнесин негиздешкен. Алар өзүлөрүнүн кондитердик үйүн "Le Novelle Cake" деп аташкан. Кондитерлер жасаган айрым торттордун бийиктиги 7 метрге жетет.

Үйлөнүү тойлорго жасалган бул укмуштуудай торттор арзан эмес. Алардын баалары 5 миң доллардан 500 миң долларга чейин (343 миң сомдон 34 миллион сомго чейин). Мындай тортторду жасоого 3 жумадан бир айга чейинки убакыт керектелет, ал эми эң татаал тортту 24 адам 12 сааттан иштеп, 32 күндө жасашкан.

Учурда бизнести Тиффани Рияди бир туугандары менен жетектейт. Алардан тышкары 60 адам иштейт.

"Бизге тортторду бөлүп-бөлүп, эки жүк ташуучу унаа менен ташууга туура келет. Аны жерине алып барган соң гана орнотуп, жасалгалайбыз", - деген Тиффани Рияди.

Тортторду жасоого эргүүнү көбүнчө мультфильмдерден алышарын айткан кондитер.