Рейд: Нарында жашы жете элек өспүрүмдөр иштеп жатышкан кафеге айып пул салынды

Мамлекеттик экологиялык жана техникалык инспекциянын Нарын аймактык башкармалыгы жашы жете элек өспүрүмдөрдүн мыйзамсыз оор жумуштарга тартылгандыгын аныктоо боюнча рейд жүргүздү. Бул тууралуу бүгүн, 14-апрелде аталган мекеменин басма сөз кызматы билдирди.

Маалыматка ылайык, Нарын шаарында жайгашкан ашкана, базар жана соода түйүндөрү көзөмөлгө алынды. "Текшерүү учурунда кафелердин биринде бир нече өспүрүмдүн эмгегин пайдалануу фактылары аныкталды. Буга карата аталган жайдын жетекчилигине айып пул салынды жана түшүндүрүү иштери жүргүзүлдү", - деп айтылат маалыматта.

"Мамэкотехинспекция мектеп жашындагы өспүрүмдөрдү ар кандай оор жумуштарга тартуу боюнча республикалык деңгээлде текшерүү жүргүзүп жатат. Текшерүүнүн натыйжасында жаш балдарды ар кандай оор жумушка тартуу тыйылбай жатканы байкалды. Андыктан инспекторлор балдардын укугун коргоо багытында коомдук жайларда түшүндүрүү иштерин жүргүзүүдө", - дешет мекемеден.

Эскерте кетсек, Кыргыз Республикасында өспүрүмдөрдү оор жумушка тартуу жана эмгегин пайдалануу мыйзамсыз болуп эсептелинет.