"Adidas" кроссовкаларын кийген мумия Кыргыз Каганатынын тушунда каза болгону аныкталды

Былтыр Алтай тоолорунан 1500 жылдык мумия табылганын анын бутундагы "Adidas" кроссовкаларына окшош бут кийими дүйнө жүзүнө кабардар кылган. 12 ай бою окумуштуулар бул табышмактуу мумияны изилдешти. Анын кылдаттык менен тазаланган кийимдеринин сүрөттөрүн The Siberian Times жарыялаган. Эми Монголиянын маданий баалуулук борборунун эксперттери бул аялды 1100 жыл мурун башынан катуу жаракат алганынан каза болгонун айтышууда.

Dailymail басылмасы аталган борбордун директору Гальбадрах Энхбат мумиянын бут кийими Adidas кроссовкаларына окшош болгондуктан изилдөө кызык болгонун айтканын жазат. Жергиликтүү мода эксперти бут кийимдер кызыктай болгону менен, заманбап көрүнөрүн, жогорку сапатта тигилгенин, ачык түстөрү жакканын айтып, мындай бут кийимди өзү да киймек экенин белгилеген.

Мумия жана аны кийимдери 2800 метр бийиктикте, муздак жерде, чыйырдуу зат менен капталгандыктан, жакшы сакталган. Окумуштуулардын ою боюнча, ал X кылымда көмүлгөн. Ошондой эле аны менен кошо сумкасын, 4 жолку кийимин, тарагын, күзгүсүн, бычагын, атын, анын ээрин жана жабдыктарын кошо көмүшкөн.

"Ал ошол кездеги карапайым эле аял болгонун болжолдоп жатабыз. Анын сумкасында тигүүчү аспаптары бар болгондуктан, ал тикмечи болсо керек деп жатабыз. Анын бут кийиминдеги, куржунундагы саймалар жергиликтүү тургундардын колунан сайылганынан кабар берет", - деген Гальбадрах Энхбат.

Белгилей кетсек, аталган аймакта IX—X кылымдарда Улуу Кыргыз каганаты жайгашкан.