"Тамашоу" Лигасынын жарым финалында "Ошингтон" биринчи орунду алды. Финалга 6 команда өттү (фоторепортаж)

Бүгүн, 16-апрелде Бишкектеги "Сейтек" балдар борборунда "Тамашоу" Лигасынын жарым финалы болуп өттү. Анда "Stud life", "Келечек", "Мисс шоу", "Ассорти", "Мурас", "Бугу", "National", "Ошингтон", "МК шоу", "МКБ", "Ала-Тоо", "Универсал" курама командалары оюн көрсөтүштү. Ал эми калыстар тобунун катарында SUPER.KG порталынын директору Бактыгүл Сокушова, ырчы Урмат Усенов, режиссёр Рысбек Жабиров, "КG group" курулуш компаниясынын президенти Имамидин Ташев жана мушкер Мыктыбек Мамасалиев болду. Командалар коомдогу, саясаттагы окуяларды тамаша аркылуу көрсөтүшсө, залдагы күйөрмандар суратпай кол чаап, командаларды кызуу колдоп жатышты.

"Тамашоу" Лигасынын жарым финалында айтылган тамашалар:

Келинге ыр:

"Келин келгенский, салат жасаганский,

Коноктор туалетке очередге турганский".

Жаш балдардын ыры:

"Свет өчтү карачы, ошондо биз жаралдык".

"Stud life" командасынын оюнчусу 3 айда жазган орусча ыры:

"Вот эта улица, вот это дом,

Вот эта улица, вот это дом.

Припев: Вот эта улица, вот это дом,

Вот эта улица, вот это дом".

Африкалык кара терилүү балдардын кыргыз кыздарын жактырып, ыр чыгаргандыгы:

"Сен мага тийсең, анда не болмок?

Үйүбүз шаңга, бактыга толмок.

Сенин жүзүң сары, меники кара,

Айтор, балдарыбыз да билайн болмок".

Эгемендүү Кыргыз өлкөсүнө арналат:

"Мына ошентип эгемендүү кыргыз элим гүлдөсүн,

Галдир-гүлдүр болсо дагы, депутаттар сүйлөсүн".

Оюндун соңунда 12 командадан 6 команда финалга өттү. Буга чейин болуп өткөн оюндардагы бардык упайлардын эсеби боюнча 6-орунду "МК шоу", 5-орунду "Универсал", 4-орунду "Ассорти" алса, алдынкы үчтүккө Баткенден келген "Stud life", "Бугу", "Ошингтон" командасы кирди. Ошентип 6 команда май айында өтчү финалда чемпиондук үчүн күч сынашышат.