Бишкекте Лев Толстой көчөсүндөгү 2-3 кабаттуу үйлөрдүн ордуна көп кабаттуу турак жайларды куруу мерчемделүүдө (фото)

"Бишкекглавархитектура" муниципалдык мекемесинин маалыматына ылайык, Лев Толстой көчөсүндөгү "Бишкеккурулуш" фирмасынын менчигиндеги жер тилкеге көп кабаттуу турак үйлөрдү куруу мерчемделүүдө. Бул тууралуу бүгүн, 17-апрелде Бишкек шаардык мэриясынан кабарлашты.

Учурда ал тилкеде 1950-1960-жылдары салынган 2-3 кабаттуу үйлөр бар. Алардын көпчүлүгү коопсуздук нормаларына жооп бербейт жана авариялык абалда. Буга байланыштуу ал үйлөрдү сүрдүрүү каралып, ордуна ашканасы башка бөлмөлөрдөн бөлүнбөгөн (батир-студия) көп кабаттуу турак жайларды салуу мерчемделүүдө.

"Ал үчүн бул долбоор коомдук талкууга 17-майда коюлат. Аталган тилкенин аянты 2,4 гектар. Ал Лев Толстой, Алексей Фатьянов, Касым Тыныстанов көчөлөрү: чыгыш тарабынан "Бишкеккурулуш" салган 5 кабаттуу жаңы турак үйлөр, батыш тарабынан 5 кабаттуу кыш менен салынган үйлөр, түндүк тарабынан Лев Толстой жана темир жол менен, түштүк тарабынан Түштүк-2 кичи районунун 9 кабаттуу үйлөрү менен чектешет", - деп жазылат маалыматта.

Учурда 2-3 кабаттуу үйлөрдүн 1-кабаттарында банк, дүкөн, кеңселер жайгашкан. Ошондой эле тилкеде спорттук аянт, трансформатордук станция, таштанды контейнерлери жана темир гараждар жайгашкан.

Долбоор боюнча тилкеде тогуз ар кандай бийиктикте имараттар курулат. Алардын бешөө (бир 15 кабаттуу, төрт 10 кабаттуу) кыш менен салынса, экөө (18 жана 10 кабаттуу) темир-бетондон салынат.