Индияда токойдо маймылдар тарбиялаган кыздын ата-энеси табылды

Индияда мындан бир жылга жакын убакыт мурун жоголуп кеткен 10 жаштагы Ализа аттуу кыз ата-энеси менен табышты. Чет элдик маалымат каражаттары бүгүн, 18-апрелде маалымдагандай, бул убакыт аралыгында кызды маймылдар багып келген.

Токойдо маймылдар менен жашаган кыз сүйлөгөндү унуткан, эки буттап баспай, эки колун кошо жерге коюп, төрт аяктап басып калган. Кыздын 45 жаштагы атасы Рамзан Али Шах менен 35 жаштагы апасы Назма кызы алар менен чогуу базарда жүргөн кезде качып кеткен боюнча дайынсыз болуп келгенин белгилешет.

Алар кызынын табылгандыгы тууралуу гезиттен окуп билишкен.

"Биз көргөн көзүбүзгө ишенбей жаттык, базардагы тыгында бизден качып кеткен боюнча Ализаны таба албай калдык. Аны издеп-табууга жергиликтүү полиция жетишерлик деңгээлде көңүл бурган жок", - дейт атасы.

Анын айтымында, Ализа психикалык жактан жабыркайт, жоголгон күнү ата-энеси базардан ага дары алып жатышкан. Эми Шах жана анын жубайы табылган кыз чын эле Ализа экенин тактоо үчүн канын текшертүүнү көздөөдө.