Чемпиондор Лигасы: “Барселона” “Ювентустун” 3 гол артыкчылыгын жоюуга белсенет, “Монако” дортмунддук “Боруссияны” кабыл алат

20-апрелге караган түнү Чемпиондор Лигасынын чейрек финалдык оюндарынын жооптук беттештери жыйынтыкталат. Жарым финалдык эки жолдомого 4 команда ат салышат. “Барселона” өз үйүндө туриндик “Ювентусту” кабыл алса, Монакодо жергиликтүү команда дортмунддук “Боруссия” менен ойнойт.

Де-жавю. Эрдик кайра кайталанбы?

"Барселона" (Испания) - "Ювентус" (Италия)

Биринчи оюндун жыйынтыгы – 0:3

Стадион: Барселона шаары, "Камп Ноу" стадиону.

Калыс: Бьорн Кейперс (Голландия).

Башталышы: 00:45 (Бишкек сааты боюнча)

“Барселона”: Ири эсептеги жеңиш керек

Каталондук клуб кайрадан капаска түшкөн абалда. Мындан чыгуу үчүн Месси жана анын командасы аз дегенде 3 гол киргизүүсү абзел. Бул эми Париждики эмес, Туриндики. Алгачкы оюндагы 3:0 эсебин эми жокко чыгаруу керек. Луис Энрикенин футболчулары үчүн бул ири эсептин артыкчылыгын жоюу кадимки көрүнүш сыяктуу болуп калгандай. Андыктан Каталонияда эч ким дүрбөлөңгө түшкөн жок. “Барселона” оюнчулары өздөрүнө ишенип турарын белгилеп жатышат. Луис Энрике командасы бул оюнда чабуул, чабуул жана чабуул деген тактика менен ойной турарын айтып өттү. “Биздин максат – 5 гол киргизүү. Күйөрмандарга кайрылып кетем, оюндун 80-мүнөтүнөн тарта стадиондон кетпегиле деп суранам”, - деп белгилейт. Ооба, соңку он мүнөттө эмне болуп кетерин ким билсин, болгону бул оюндун башкы калысы Дениз Айтекин эмес экендигин унутпаган оң.

“Ювентус”: Коргонуудагы мастер-класс

Италиялык командалар коргонуу боюнча алдына эч кимди салдырбайт. Туриндик “Ювентус” өзгөчө. Анткени мыкты коргоочулар менен бирге дарбазада айтылуу Жанлуиджи Буффон өзү турат. Аталган оюнда туриндиктер коргонууну бекемдеп, кези келгенде контр чабуулга чуркайт. “Барселонада” Месси болсо, “Ювентуста” Дибала бар. Үй ээсинде Суарес болсо, коноктордо Игуаин бар. Чабуулчулар мыкты оюн көргөзөбү же коргоочуларбы муну оюндан байкайбыз. “Ювентустун” коргоочусу Жоржо Кьеллини “Барселона оюнчулары акулалардай. Эгерде кандын жытын сезсе, анда өлгөнүң” деп айтат. “Ювентус” буга даярбы, оюн далил болот.

Чабуулчулар майрамы

"Монако" (Монако) - "Боруссия Д" (Германия)

Биринчи оюндун жыйынтыгы – 3:2

Стадион: Монако, "Луи II" стадиону.

Калыс: Дамир Скомина (Словения)

Башталышы: 00:45 (Бишкек сааты боюнча).

“Монако”: Мбаппе жылдызга айланабы?

Франциянын чемпиондугунда учурда лидерик сапта келе жаткан “Монако” быйылкы Чемпиондор Лигасынын эң кызыктуу командасы. Курамында жаш жана жеңишке суусап турган футболчулар гол киргизүүдөн тажабайт. Аталган команда чабуул коюуну биринчи максат кылып коёт. Демек, бул оюнда да форварддар алдынкы планга чыгат. Фалькаонун карамагында болуп жаткан 18 жаштагы Киллиан Мбаппе жылдызы жана турган мезгил келгендей. Эгерде бул оюнчу командасын жарым финалга сүйрөй алса, анда келечекте “Алтын топ” ээси дал ушул форвард болот сыңары.

“Боруссия Д”: Марко Ройс үмүтүн үзбөйт

Томас Тухель аталган оюнда “биз 1-мүнөттөн 90-мүнөткө чейин чабуулга баруудан башка аргабыз жок” деп айтып өттү. Ооба, дортмунддук команда жок дегенде 2 гол киргизбесе жарым финалга өтө албайт. Бул команданын чабуул коюу мүмкүнчүлүгү жогору экендигин бардыгы билет. Аталган клубдун жылдыздуу жарым коргоочусу Марко Ройс бул беттешке чыгууга даяр. Германиялык футболчу менен катар чабуулчу Обамеянг командасын алга сүйрөй алабы, оюн көргөзөт.