Өкмөт: "Баткен облусунда 3 850 гектар жаңы сугат жер өздөштүрүлдү"

Бүгүн, 21-апрелде, Баткен облусунун Кадамжай районуна караштуу Ак-Турпак айылындагы Бүргөндү массивиндеги ирригациялык түйүнүнүн ачылышы болот. Бул тууралуу өкмөттүн басма сөз кызматы билдирди.

Маалым болгондой, бүгүнкү күндө Баткен облусунда жаңы сугат жерлерди өздөштүрүү долбоорун ишке ашыруунун алкагында Бүргөндү массивиндеги 3 850 гектар жаңы сугат жер өздөштүрүлдү.

"Баткен облусунун Кадамжай районундагы Бүргөндү массивиндеги жаңы сугат жерин өздөштүрүү" долбоору 2013-2017-жылдарга Кыргыз Республикасынын туруктуу өнүгүү Улуттук стратегиясынын алкагында ишке ашты. Долбоордун алкагында узундугу 1,56 чакырым болгон эки суу тосмосу менен дюкер, 3 чакырым болгон жабдуулары жана ички чарбалык түйүнү менен магистралдык канал курулду. Жыйынтыгында 3850 гектар сугат жери өздөштүрүлдү", - деп айтылат маалыматта.

Ирригациялык түйүндүн ачылыш аземине Кыргыз Республикасынын Премьер-министри Сооронбай Жээнбеков, Кыргыз Республикасынын Президенттик аппаратынын жетекчиси Сапар Исаков, Өкмөттүн Баткен облусундагы ыйгарымдуу өкүлү Абиш Халмурзаев, Айыл чарба тамак-аш өнөр жайы жана мелиорация министрлигинин алдындагы суу чарба жана мелиорация департаментинин директору Көкүмбек Таштаналиев катышат.