Сапар Исаков Кадамжай районунун Бүргөндү айылындагы ирригациялык түйүндүн ачылышына катышты

Бүгүн, 21-апрелде, Баткен облусунун Кадамжай районуна караштуу Ак-Турпак айылындагы Бүргөндү массивиндеги ирригациялык түйүндүн ачылышы болду. Ага президенттик аппараттын жетекчиси Сапар Исаков, өкмөт башчы Сооронбай Жээнбеков, Өкмөттүн Баткен облусундагы ыйгарымдуу өкүлү Абиш Халмурзаев катышышты. Бул тууралуу өкмөттүн басма сөз кызматы билдирди.

Өкмөт башчы бүгүнкү ачылып жаткан ири долбоордун кыска убакыт аралыгында ишке ашарына көптөр ишенбегендигин баса белгиледи.

"Президенттин жеке көзөмөлү менен аталган долбоор ишке ашты. Долбоорду ишке ашыруу өлкөнү бекемдеп, ички миграция агымын азайтып, жергиликтүү тургундарга кошумча жумуш орундарын түзөт. Бүгүнкү күндө суу дүйнө жүзүндө эң баалуу ресурска айланды. Биз өлкөдөгү суу ресурстарын чоң жоопкерчилик менен аярлап, эффективдүү колдонушубуз керек", - деди Сооронбай Жээнбеков.

Премьер-министр Өкмөт сугат суу башкаруу системин иштеп чыгуу жана жакшыртуу үчүн мындан ары да иштерди улантарына басым жасады.

Белгилүү болгондой, "Баткен облусунун Кадамжай районундагы Бүргөндү массивиндеги жаңы сугат жерин өздөштүрүү" долбоору 2013-2017-жылдарга Кыргыз Республикасынын туруктуу өнүгүүнүн улуттук стратегиясынын алкагында ишке ашты.

Долбоордун алкагында узундугу 1,56 чакырым болгон эки суу тосмосу менен дюкер, 3 чакырым болгон жабдуулары жана ички чарбалык түйүнү менен магистралдык канал курулду. Жыйынтыгында 3850 гектар сугат жери өздөштүрүлдү.