Орусияда 17 жаштагы өспүрүмдүн огунан Кыргыз жараны жаракат алды

21-апрель күнү кечинде Орусиянын Хабаровск шаарында өспүрүм Федералдык коопсуздук кызматынын аймактык бөлүмүнүн имаратына кол салып, 2 адам каза тапты. Бири аталган мекеменин кызматкери, экинчиси ал жерде жумуштары менен жүргөн катардагы жаран. Дагы бир адам жаракат алып, ооруканага жеткирилди.

Тышкы иштер министрлигинин маалыматына таянсак, жаракат алган адам Кыргыз мамлекетинин жараны Талант Жумаев. 1980-жылы туулган Жумаев аталган мекемеге котормочу катары чакырылганы белгилүү болду. Кыргыз мамлекетинин Хабаровск шаарындагы консулу мекендешибиз жаткан ооруканага барып, абалын көрдү. Оорукана кызматкерлеринин билдиришинче, Жумаев азыркы учурда жандандыруу бөлүмүндө. Абалы туруктуу оор деп бааланууда.

Күч кызматкерлери тарабынан куралчан өспүрүм жок кылынды. Ал Хабаровск аймагынын 1999-жылы туулган тургуну болгон.