Жыргалаңдагы шахтадан куткарылган шахтёр: "Жер астында канча убакыт өткөнүн билген жокпуз"

Бүгүн, 24-апрелде "Жыргалаң" көмүр казуучу шахтасында калып калган 2 шахтёр куткарылганын Өзгөчө кырдаалдар министрлигинин басма сөз кызматы билдирген. Куткарылган шахтёрлордун бири Кайрат Доргоев SUPER.KG`ге учурда абалы жакшы экенин айтып, ооруканага бара жатканын билдирди.

"Жер астында болгондуктан канча убакыт өткөнүн билген жокпуз. Көрсө, 2 күндөй болуп кетиптир. Учурда абалыбыз жакшы, ооруканага бара жатабыз", - дейт Кайрат Доргоев.

Белгилей кетсек, 22-апрелде болжол менен саат 17:35 чамасында "Жыргалаң-Дөргөкөмүр" ЖЧКсы иштеп жаткан шахтада кырсык катталып, ичинде 2 шахтёр калып калган. Анда жер алдынан суу ресурсу пайда болуп шахтанын үстү түшүп жабылып калган. Шахтёрлорду издөө үчүн 200дөй адам тартылган. Кырсыкка кабылгандар Кайрат Доргоев жана Азамат Тойматов узундугу 500, тереңдиги 117 метр шахтанын ичинде калышкан.