Өмүрбек Бабанов Орусиядан келген эмгек мигранттарын аэропорттон көпкө чейин текшергенге нааразы болду

“Республика – Ата Журт” фракциясынын лидери Өмүрбек Бабанов Орусиядан келген эмгек мигранттарын аэропорттон көпкө чейин текшергенге нааразы болду. Бул тууралуу ал бүгүн, 25-апрелде парламенттин Конституциялык мыйзамдар, мамлекеттик түзүлүш, сот-укуктук маселелер жана Жогорку Кеңештин Регламенти боюнча комитеттин жыйналышында билдирди.

Депутат Ош, Баткен облустарына барганда жарандар аталган көйгөйдү айтышканын айтты.

“Ош, Баткен облусуна иш сапарым менен барып келдим. Мага жарандар кайрылып, нааразы болуп жатышат. Орусиядан келген эмгек мигранттарын аэропорттон көпкө чейин акчасынан бери текшерип жатышыптыр. Алар ак эмгеги менен каражат тапкандар да. Сириядан келгендерди ушинтип текшеришпейби? Ош жана “Манас” аэропортунун жетекчилерин алмаштырыш керек. 5 жерге барсак, 5 жерден ушул маселени айтышууда. Мындан тышкары туристтерди өлкөгө тартыш керек деп айтабыз. Бирок башка жактан келген жарандарды көп убакытка чейин ушинтип кармасак, алар биздин мамлекет жөнүндө кандай ойдо калышат”, - деди ал.

Премьер-министр Сооронбай Жээнбеков аэропорттордо көйгөйлөр бар экенин айтты. Ошондой эле эки аэропорт тең текшерүүдөн өткөнүн билдирди. Бул маселе өкмөттүн жыйынында каралып, чара көрүлө турганын белгиледи.

Учурда аталган комитетке өкмөт 2016-жылы аткарган иштери тууралуу отчёт берип жатат.