Индиянын Нью-Дели шаарында кыргыз улуттук ашканасынын жумалыгы болуп өттү (фото)

Индиянын борбору Нью-Дели шаарында кыргыз улуттук ашканасынын жумалыгы өттү. Бул тууралуу бүгүн, 25-апрелде Тышкы иштер министрлигинин маалымат кызматы SUPER.KG порталына билдирди.

Билдирүүгө ылайык, кыргыздын улуттук тамак-аштарын көрсөткөн бул иш-чаранын максаты - ата мекендик продукцияны Индияга жайылтуу, кыргыз элинин салты, маданияты менен тааныштыруу болгон.

"Нью-Делидеги ресторандардын бириндеги конокторго 1 аптадан ашык Кыргыз мамлекетинен алынган азыктардан даярдалган тамак-аштар берилип жатты. Жумалыктын алкагында дайымкы менюга кыргыздын улуттук тамак-аштары да киргизилди. Беш бармак, куурдак, манты, палоо, боорсок, чак-чак өңдүү бир топ тамак-аштар дасторкондун үстүнө коюлуп конокторго тартууланды. Ашкана жумалыгы кыргыздын кол өнөрчүлөрүнүн эмгектеринин көргөзмөсү, "Балажан", "Чолпон" музыкалык-бий топторунун таланттары менен коштолду", - деп жазылат маалыматта.

Иш-чарага күбө болгондор кыргыздын улуттук тамак-аштарынын экологиялык жактан таза экенине баа беришти.