Бишкектин Ала-Тоо-3 жаңы конушунун эли 5 жылдан бери чаңы сапырылган жолдор оңдолбогонуна нааразы

Бишкектин Ала-Тоо-3 жаңы конушунда унаа жолунун абалы оор. Жаңы конуштун көчөлөрү унаа өткөн сайын чаңдап жатат.

Жашоочулардын айтымында, күн сайын мектеп окуучулары чаңдуу жолду жээктеп мектепке барышат. Аба ырайынын жаан-чачындуу күндөрүндө жол ылай болуп айдоочуларга да, жашоочуларга да ыңгайсыздык жаратат. Мындан улам жергиликтүү жашоочулар жолдорду оңдоого өздөрү аракет көрүп башташкан. Ал үчүн ар бир кожолук 4 миң сомдон каражат чогултууда.

Атын атагысы келбеген жергиликтүү тургун жолдордун абалы начардыгынан өкмөт башчыларына жана шаар мэрине нааразычылык билдирди.

"Өспүрүм балдар мындай турсун чоң кишилер чаң жутуп жашап жатабыз. Чоңдорубуз элдин эртеңин ойлобой калышты. Жолубузга асфальт төшөп берсе болмок. Акыркы 5 жылдан бери эл катуу кыйналды. Сапырылган чаң үйгө чейин кирет. Бишкекте жашап туруп өлкөнүн алыскы айылында жашагандай күн кечирип жатабыз. Эртең менен, кечке маал маршруттук унааларда жүргүнчүлөр көп болуп кыйналабыз", - дейт жергиликтүү тургун.