Орусиянын спорт калыстар агенттигинин башчысы Дастан Шаршеевдин мелдеши боюнча өз оюн айтты

Орусиянын спорт калыстар агенттигинин башчысы Игорь Демидов кыргыз мушкери Дастан Шаршеев менен орусиялык мушкер Антон Калининдин мелдешинде болгон жагдайга байланыштуу оюн айтты. Эскерте кетсек, 22-апрелде Татарстанда өткөн TNA (Total Nonstop Action Wrestling) мелдешинде калыстар жеңишти орус мушкерине беришкен. Дастан Шаршеевдин ою боюнча, жеңиш адилетсиз ыйгарылган. Андыктан ал рингден көпкө кетпей, өз оюн микрофон менен айтканга жетишкен. Ал эми калыс аны Орусиядан депортация кылып, мелдештен биротоло четтетүү менен коркуткан.

Игорь Демидов TNA лигасынын жетекчилерине кайрылып, ар кайсы өлкөнүн калыстарынан комиссия түзүүнү, адилеттүү чечим чыгарууну, спортчулардын мелдешин тейлеген калыстар тобун талдап чыгууну сунуштады. Мындан сырткары ал Дастан Шаршеевди маселени юридикалык жак менен чечүүгө чакырды. Анын айтымында, алгач калыс кыргыз мушкеринин кадырына тийчү сөздөрдү айткан.

"Бул мелдешке байланыштуу социалдык тармактарда катуу талкуу жаралып, мелдешти тейлеген калыстардын чечими адилетсиз болгонун жазышууда. Тил албаганы үчүн депортация болору тууралуу айтканына байланыштуу TNA лигасы калыстар тобун талдап, ким иштээрин аныкташы керек. Калыс спортчуну коркутканы боюнча атайын комиссия түзүлүп, ага чара колдонулушу керек. Ошондой эле кыргыз мушкери эмоционалдуулукка алдырбай, маселени юридикалык жактан чечиши керек", - деген өз сөзүндө Игорь Демидов.