Жогорку Кеңеште жашы жете электерге энергетикалык ичимдиктерди сатууга тыюу салуу сунушталды

Бүгүн, 26-апрелде Жогорку Кеңеште жашы жете электерге энергетикалык ичимдиктерди сатууга тыюу салуу сунушталды.

“Кыргызстан” фракциясынын депутаты Нурлан Макеев билдиргендей, “Этил спиртин жана алкоголдук продукцияны өндүрүүнү жана жүгүртүүнү мамлекеттик жөнгө салуу жөнүндө” мыйзамына, Администрациялык жоопкерчилик жөнүндө кодексине өзгөртүү киргизүү” мыйзам долбоору жашы жете электердин ден соолугун сактап калууга багытталган.

“Энергетикалык ичимдиктердин курамында сергитүүчү кофеин, таурин, L-карнитин, глюкуронолактан сыяктуу өзгөчө компоненттер жана ингридиенттер бар. Негизги сергитүүчү компоненттери болуп синтетикалык жол менен пайда болгон кофеин саналат. Кофеин ичүүгө бир суткада 150 миллиграмм гана жол берилет. Энергетикалык ичимдиктердин курамында 250 миллиграмм бар. Демек, ченемден ашып жатат. Мунун бардыгы өспүрүмдөрдүн ден соолугуна терс таасирин тийгизип, нерв менен жүрөк-муун тутумуна залал келтирет”, - деди ал.

Мыйзам долбоордо жашы жете электерге энергетикалык ичимдигин сатканга тыюу салынуу керектиги жазылган. Эскертүүнү эске албагандарды администрациялык жоопкерчиликке тартуу каралган. Бул мыйзам долбоор экинчи окууда добуш берүүгө жөнөтүлдү.