"Коопсуз шаар" долбоорун өкмөт соттук териштирүүдөн кийин карайт

"Коопсуз шаар" долбоору соттук териштирүүлөр бүткөндөн кийин көзөмөлгө алынат. Бул тууралуу 27-апрелде парламентте премьер-министр Сооронбай Жээнбеков билдирди. Бирок долбоорду ишке ашыруунун болжолдуу убактысы айтылган жок.

"Соттук териштирүү бүткөндөн кийин каралат" деген жооп көптөн бери айтылып келе жатат. 2016-жылдын 1-июнунда Жогорку Кеӊештин депутаттары долбоор качан ишке ашырыларын ошол кездеги ички иштер министри Кашкар Жунушалиевден сурашкан. Жунушалиев да бүгүнкү премьер Жээнбеков айткан жоопту узатып: "Аталган долбоор боюнча соттун токтому чыгары күтүлүүдө, андан соӊ долбоорду ишке ашырам", - деген.

Белгилей кетсек, "Коопсуз шаар" долбоорун ишке киргизүү аракети 2012-жылы башталган. Долбоор боюнча 2 жолу тендер өтүп, 2 жолу теӊ "тендер мыйзам бузуулар менен өттү" деп документке ошол кездеги ички иштер министрлери кол коюудан баш тартышкан. Бүгүнкү күндө соттук иштер уланууда.