Авиакырсыктан каза болгондордун жана жабыркагандардын туугандарына ӨКМнын атайын эсебинен каражат которулду

2017-жылдын 16-январында Чүй облусунда болгон "Боинг-747" авиакырсыгынан каза болгондордун жана жабыркагандардын туугандарынын персоналдык банктык эсептерине Кыргыз Республикасынын Өзгөчө кырдаалдар министрилигинин атайын эсебине түшкөн каражат бөлүнүп, которулду. Бул тууралуу бүгүн, 27-апрелде Өкмөттүн басма сөз кызматы кабарлады.

Маалыматка ылайык, атайын эсепке калк тарабынан 100 миллион 499 миң 300 сом түшкөн.

"Жабырлануучулардын өздөрүнүн өтүнүчү боюнча, аларга бөлүнгөн каражат, алардын талаптары боюнча ар кандай чыгымдарына төлөнүү үчүн, ар биринин жеке банктык эсебине которулду. Ошондой эле жабырлануучулардын өздөрүнүн өтүнүчү боюнча, ар кандай механизмдерге жол бербөө үчүн, үй сатып алуу үчүн бөлүнгөн каражаттар башкаруу мамлекеттик комиссия тарабынан көзөмөлдөнүп турат", - деп билдиришти өкмөттөн.

Турак жай сатып алууга каражат берилгендигине байланыштуу, каза болгондордун жана жабыр тарткандардын үй-бүлөлөрүн мамлекет тарабынан каражат төлөп убактылуу жайгаштыруунун зарылдыгы жок экени белгиленет маалыматта. Буга байланыштуу алар менен макулдашылып, алар жашаган убактылуу турак жайлар бошотулат.

Ошондой эле "ACT Airlines" түрк авиакомпаниясы тарабынан акчалай компенсация күтүлүүдө.