Мыктыбек Абдылдаев өкмөттүн отчётунда аймактарды өнүктүрүү, “Кумтөр” жана “Кара-Кече” тууралуу айтылбаганына нааразы болду

Бүгүн, 27-апрелде Жогорку Кеңеште "Бир Бол" фракциясынын депутаты Мыктыбек Абдылдаев өкмөттүн отчётунда аймактарды өнүктүрүү, “Кумтөр” жана “Кара-Кече” тууралуу айтылбаганына нааразы болду.

Премьер-министр Сооронбай Жээнбеков отчёт берип жатканда аймактарды өнүктүрүү боюнча кыскача маалымат бергенин эскертти. Ал эми "Кумтөр" боюнча сүйлөшүүлөр жүрүп жатканын, жылыш бар экенин белгилеп, жыйынтыгы кийин айтыла турганын билдирди. Мыктыбек Абдылдаев 7 жылдан бери жылыш болбой жатканын айтты.

Ал эми өнөр жай, энергетика жана кен иштетүү боюнча мамлекеттик комитеттин төрагасы Дүйшөнбек Зилалиев "Кара-Кече" боюнча эл аралык стандарттарга жооп берген сынак жарыяланганын билдирди. Анын айтымында, сынакка 7 компания катышып, тилекке каршы, баары чыгып кетишкен. Себеби алар көп акча каражатты талап кылышкан. Дүйшөнбек Зилалиев бул маселени жылдын аягына чейин бүтүргөнгө аракет кыла турганын билдирди.

Парламентке өкмөт 2016-жылы аткарган иши боюнча отчёт берип жатат.