FaceApp тиркемесин жасаган программист "расисттик" фильтр үчүн кечирим сурады

Учурда популярдуу болуп жаткан FaceApp тиркемесин жасаган Ярослав Гончаров тиркемедеги "расисттик" фильтр үчүн кара терилүүлөрдөн кечирим сурады. Бул тууралуу The Guardian басылмасы жазып чыкты.

Маалыматка ылайык, кара терилүүлөр тиркеменин "Hot" фильтри үчүн нааразы. Ал фильтр адамдын келбетин жагымдуу кылат. Анын бир ыкмасы адамдын терисинин өңүн агышыраак кылуу болгон. Бул фильтрден кийин өзүн көргөн кара терилүүлөр кыжырданышып, FaceApp'ты расисттик тиркеме дешкен.

Алар FaceApp кара терилүүлөрдү европалыктарга окшоштуруп коёрун айтышып, бул расизмдин түрү экенин белгилешкен. Ярослав Гончаров акыры алгоритмдердин туура эмес иштегени үчүн кечирим суроого мажбур болгон.

"Бул расизм эмес. Жөн гана сүрөттү өзгөртүүчү нейрондук түйүндөр туура эмес жөндөлүп калган. Биз учурда бул жагымсыз жагдайды оңдоо аракетин көрүп жатабыз", - деген программист.