Мушкер Дастан Шаршеевдин реванштык беттеши 2 айдан кийин болот

Кыргыз мушкери Дастан Шаршеевдин реванштык беттеши 2 айдан кийин болот. Бул тууралуу мушкер өзүнүн социалдык баракчасындагы видео кайрылуусунда айтты.

"Биз TNA лигасынын жетекчилери менен бул маселени "эркекче" чечүүнү туура көрдүк. Менин атаандашым Антон Калинин менен реванштык беттешим 2 айдан кийин өтөт. Ага чейин даярданууга убакытым болот", - деди ал кайрылуусунда.

Ошондой эле Дастан Шаршеев улутчулдук тууралуу маселени көтөрбөөнү суранып, орус менен кыргыз эли достошуп келгенин белгиледи.

Эскерте кетсек, Кыргыз мушкери Дастан Шаршеев Татарстанда өткөн турнирде орусиялык Антон Калинин менен кез келген. Ал атаандашын 3-раундда нокдаунга учуратса да, калыстар жеңишти орусиялык мушкерге ыйгарышкан. Мындан улам Кыргыз спортчу рингден түшпөй койгон. Ага барган калыс депортация менен коркуткан, ага карабастан Дастан Шаршеев микрофонго өз нааразычылыгын айткан.