ӨКМ: "Өзгөн районунда жер көчкү алдында калган турак жай ээлерине коопсуз жайга көчүү боюнча эскертүү берилген"

Өзгөн районунда жер көчкү алдында калган турак жай ээлерине коопсуз жайга көчүү боюнча эскертүү берилген. Бул тууралуу бүгүн, 29-апрелде Өзгөчө кырдаалдар министрлигинен билдиришти. Бирок аталган министрлик эскертүү качан берилгенин, элди коопсуз жайга көчүрүү боюнча кандай чаралар көрүлгөнүн айтышкан жок.

Айта кетсек, 29-апрель күнү эртең менен Өзгөн районунун Заргер айыл аймагындагы Аюу айылында жер көчкү жүрүп, 7 турак жайды басып калган. Анын бирөөсүндө эч ким жашачу эмес, ал эми 6 турак үйдө адамдар жашаган. Алдын ала маалымат боюнча жер көчкү алдында 24 адамдын калганы айтылууда. Кырсык болгон жерге Өзгөчө кырдаалдар министри Кубатбек Бороновдун чыгып кеткени белгилүү болду.