Өзгөн районунда көчкү алдында калгандарды издөө иштери жүрүп жатат

Өзгөн районунда көчкү алдында калгандарды издөө иштери жүрүп жатат. Бул тууралуу бүгүн, 29-апрелде Өзгөчө кырдаалдар министрлигинен билдиришти.

Маалыматка караганда, издөө иштерине 100 куткаруучу тартылды. Ошондой эле кошумча 34 куткаруучу кырсык болгон жерге чыгып кетишти.

"Азыркы учурда жеринде Өзгөчө кырдаалдар министри Кубатбек Боронов башчылыгында издөө иштери жүрүп жатат. Ошондой эле ӨКМнын алдындагы Кризистик кырдаалдарда башкаруу борборунун көчмө башкаруу пункту иш алып барууда", - деп айтылат ӨКМнын маалыматында.

Айта кетсек, 29-апрель күнү эртең менен Өзгөн районунун Заргер айыл аймагындагы Аюу айылында жер көчкү жүрүп, 7 турак жайды басып калган. Анын бирөөсүндө эч ким жашачу эмес, ал эми 6 турак үйдө адамдар жашаган. Алдын ала маалымат боюнча жер көчкү алдында 24 адамдын калганы айтылууда.