Заргердин тургуну: "Жер көчкүнүн алдындагылар тирүү калгыдай эмес"

Бүгүн, 29-апрелде Өзгөн районунун Заргер айыл аймагындагы Аюу айылында жер көчкү жүрүп, 7 турак жайды басып калган. Алдын ала айтылган маалыматтар боюнча, жер көчкүнүн астында 24 адам калды. Жергиликтүү тургун Латип Абдуллаевдин үйү кырсык болгон жерден 2 чакырым алыстыкта болсо да, жердин көчкөнү ага чейин угулган.

"Эртең менен катуу дабыш чыкты, жер көчтү окшойт дедим, бирок мынчалык көлөмдүү деген ой келген жок. Төмөн жак бозоруп эле, чаң болуп калыптыр. Дароо ал жакка жөнөдүк. Учурда куткаруучулар менен үйлөр жайгашкан болжолдуу жерлерди казып жатабыз. Буга чейин бул аймактагы тургундарга көчүү тууралуу эскертүүлөр келип, ссудалар да берилген. Кыргызчылык да... Тургундар "ата-бабалардын жеринен кетпейбиз" деп жашап келишкен", - дейт Латип Абдуллаев.

Учурда жакындарын жоготкондор кырсык болгон жерге келип, аларды жоктошууда.

"Жер көчкү түшкөн аймактын четиндеги үйдө жашаган үй-бүлөнүн баласы качып чыкканга үлгүрүптүр. Апасы ал маалда үйдө эмес экен. Азыр келип, үйүн жер көчкү басканын көрүп, үй-бүлөсүн жоктоп ыйлап жатат. Жер көчкү кургагыраак экен, калың да болуп түшүптүр, анын алдында эч ким тирүү калгыдай эмес", - деди тургун.

Ошондой эле Латип Абдуллаев Заргер айылында мындан сырткары да жер көчүү коркунучу бар аймактар бар экенин айтып, бүгүнкү кырсыктан кийин ал жактагылар көчүп кетишет деген ойдо экенин билдирди.