Өзгөчө стилдүү ырчы Каныкейдин чыгармачылык кечесинен фоторепортаж

Бүгүн, 29-апрелде Бишкектеги кафелердин биринде өзгөчө стилдүү ырчы Каныкей чыгармачылык кечесин өткөрдү. "Эне болгондон кийин ата-эненин кадырын сездим, көп нерсеге көз карашым өзгөрдү" деген ырчы ата-эне, жаштык, өмүр, сүйүү тууралуу чыгармаларын 2 саат бою жандуу үн менен аткарды. Ал эми комуздун коштоосундагы "Күйдүм чок", "Ак кептерим" ырларын аткаруу учурунда күйөрмандары кызуу колдоп турушту.

"Мен бир топ убакыт бала менен үйдө отурдум. Андыктан бул чыгармачылык кече чыгармачылыкка кайтканымдын башталышы гана деп айтууга болот. Эне болуу жашоомдо өзгөчө таасир, тоодой жүрөк бергенин айтып кетпедимби. Эми ырларым аркылуу ушул сезимдерди күйөрмандар менен бөлүшүп, элиме жакшылык тартуулап, баары жакшы болорун айткым келет", - дейт Каныкей чыгармачылыгы тууралуу. Ошондой эле кеченин коногу Айымжан "Ак бата" чыгармасын конокторго тартуулады.