Депутат Улугбек Ормонов: "Өкмөт тарабынан Аюу айылынын тургундарына кооптуу жайдан көчүү керектиги тууралуу эскертүү гана берилген"

Өзгөн районунун Заргер айыл аймагынын Аюу айылында 29-апрель күнү таңкы саат 07:00 чамасында көлөмү болжол менен 1 миллион метр куб жер көчкү түшүп, 7 турак үйдү басып калган. Өзгөчө кырдаалдар министрлиги кырсык болгон айылдын тургундарына жер көчкү боюнча эскертүү берилгенин айтып жатканы менен, ага олуттуу чаралар көрүлбөгөнүн бүгүнкү күндөгү кырсык далилдеп турат.

Бул окуя тууралуу SUPER.KG`ге "Бир бол" фракциясынын депутаты Улугбек Ормонов буларды билдирди:

"Мурун көчкү болгон Ничке-Сай аймагы боюнча маселе башка. Ал жерде илгертен жер көчкү коркунучу бар экендиги айтылып, бийлик тарабынан тургундарга жер бөлүнүп берилген. Ал эми ошол айылга жакын жайгашкан Аюу айылындагы тургундарга көчкүлө деп эскертүү берилгени менен, мамлекет тарабынан сертификат, жер бөлүнүп берилген эмес. Анткени жер көчкү коркунучу бар экендиги быйыл билинген. Быйылкы жер көчкүлөр башталганда ӨКМнын кызматкерлери келип, аймакты көрүшүп, жер көчкү коркунучу бар деген маалыматты тургундарга эскертишкен.

Мен азыр ушул жактамын, учурда аксакалдар менен кеӊешип, көчкү астында калган сөөктөрдү казбай эле, мүрзө кылып калтырып коюу маселеси каралып жатат. 7 үй-бүлөнүн алыскы жактагы туугандарын күтүп жатышат. Алар келишсе, баары менен кеӊешип, бир чечим кабыл алынат", - дейт Улугбек Ормонов.

Белгилей кетсек, ушул жылдын 26-мартында Өзгөн районундагы Заргер айыл аймагынын Ничке-Сай айылындагы Топ-Жаңгак участкасында жер көчкүнүн астында бир үй-бүлө мүчөлөрү калып кетип, каза болушкан. Үй-бүлө мүчөлөрүнүн тизмеси бул жерде.