Индияда мас күйөөлөрүн сабаганга колдонуу үчүн үйлөнүү тойдо 700 колуктуга таяктар белекке берилди

Индиянын Мадхья-Прадеш штатынын Социалдык акыйкаттык жана айылдуу райондорду өнүктүрүү министри Гопал Бхаргава массалык үйлөнүү тойдо 700 колуктуга жыгач таяктарды белекке берди. Бул тууралуу кечээ, 30-апрелде DailyMail басылмасы жазып чыкты.

Маалыматка ылайык, ал таяктар жергиликтүү бийлик тарабынан массалык үлпөт тойдо баш кошушкан түгөйлөрдүн колуктуларына белек катары берилген. Министр аларды аялдар күйөөлөрү мас абалында келип чуу чыгарса колдонуу керектигин айткан. Таяктардын ар биринде "Мас адамды сабоо үчүн", "Полиция кызматкерлери аралашпайт" деген жазуулар бар.

Министр колуктуларга алгач мас абалындагы күйөөсү менен сүйлөшүп көрүүнү, эгер ал сөзгө көнбөсө, ошондо гана үлпөт тойдун "өзгөчө" белегин колдонууну сунуштаган. Ал бул кадамы менен эч кимди зордук-зомбулукка үгүттөбөстөн, мас күйөөлөрү тарабынан үй-бүлөлүк зомбулукка кабылып жаткан айыл жергесиндеги аялдарга коомчулуктун көңүлүн буруу максат кылгандыгын айткан.

Аталган маалыматта мындай таяктардан дагы он миң даана таратылып берилүүсү күтүлүп жатканы айтылат. Маалымат катары айта кетсек, спирттик ичимдиктерин колдонуунун натыйжасында келип чыккан кылмыштар Индиянын кедей райондорунда көп кездешет. Бул маселе учурда өлкөнүн эӊ башкы маселелеринин бирине айланган.