Журналист: "Депутат Жылдыз Мусабекова менен болгон сүйлөшүү телефондо жазылуу. Жакында бардык далилдерди жарыялайм"

"КСДПнын депутаты Жылдыз Мусабекованы коркуткандыгы үчүн сотко берүүгө далилдерим бар" деп билдирди бүгүн, 1-майда SUPER.KG порталына журналист Үпөл Анаркулова. Буга чейин ал "КСДПнын депутаты 10 эркекке зордуктатам" деп коркуткандыгы тууралуу билдирген эле.

Анын айтымында, депутат менен сүйлөшүүлөр телефондо толугу менен сакталган.

"Ортодо аза күтүү күнү болуп калды. Жылдыз Мусабекова мага 2 жолу чалган, сүйлөшкөндөрүбүз толугу менен телефондо жазылуу. Учурда айрым журналисттер "Бул кызга пиар керек болуптур деген сыяктуу маалыматтарды жазып жатышат". Мындан улам жакында бардык далилдерди жалпыга маалымдоо каражаттарына жарыялайм. Фейсбукка эмнени жазсам, баары телефонумда жазылуу, далилдер болгон үчүн пост жаздым", - дейт Үпөл Анаркулова.

Буга чейин айтылгандай, чыр жергиликтүү гезиттердин бирине жарыяланган макаладан улам келип чыккан.

"КСДП фракциясынын депутаты айылга "крыша" деген макала жазгам. Гезитке чыккан маалыматтын тактыгын далилдеп бере алам. Коркуткандыгы тууралуу далилдердин негизинде сотко берем, ошондо мен андан эмес, ал менден кечирим сураш керек", - деп кошумчалады журналист.

Айрым маалымат каражаттары Жылдыз Мусабекованын "Мени каралагандыгы үчүн журналист кызды сотко берем" деген билдирүүсүн жарыялады. Бул боюнча депутатка байланышканыбызда:

"Эмне, башка маалыматыңар жокпу? Бул сенсациябы? Американы ачтыңарбы? Ошондой жеңил ойлуу кыздардан болбогула, жөн эле билип-билбей жаза берген. Биринчи эрге тийгиле, бала-чака баккыла, кайын журт күткүлө, бардык нерсеге жеткиле анан түшүнөсүңөр. Адамдын тагдыры менен ойногон оңой эмес. Сотко беремби, бербеймби, ал менин жеке ишим", - деп жооп берди эл өкүлү.