Аюу айылынын тургундары кайда көчөрүн билбей жатышат

Өзгөн районунун Аюу айылынын жашоочулары кайда көчөрүн билбей убара. Бул тууралуу бүгүн, 1-майда SUPER.KG порталына аталган айылдын тургуну Курманбек Сулайманов билдирди.

"Менин турак жайым көчкүнүн жогорураак жагында жайгашкан. Жолубузга көчкү түшүп районго чыга албай жатабыз. Ошол кырсык болгон күнү адистер адырларды кыдырып чыгып, бизди көчкүлө деп чатырларга жайгаштырды. Бирок эми дагы канча күн чатырда жашайбыз бизге белгисиз. ӨКМнын жетекчилиги ошол күнү эле биз менен жолугушкан, ошол бойдон аларды көргөн жокпуз. Азыр казуу иштерин ӨКМнын жөнөкөй кызматкерлери гана жүргүзүп жатышат", - дейт Сулайманов.

Эскерте кетсек, 29-апрель күнү саат 06:40 чамасында Өзгөндө жер көчкү жүрүп, натыйжада 7 турак үйдү басып калган. Алдын ала маалымат боюнча, болжол менен 6 үйдө 24 жаран көчкү алдында калып калышкан. Азыркы убакытка чейин 3 адамдын жансыз денелери табылган.