Күйөөсү таштап кетип, көчөдө калган келинге Араван райондук соту алимент кыркып бере электиги айтылды

Ош шаарында эки наристеси менен жардамга муктаж болуп, баш калкалаар үйү жок калган Наргиза Жолдошевага райондук сот бир жарым айдан бери алимент кыркып бере албай жатат. Мындай маалыматты бүгүн, 2-майда SUPER.KG порталына "Ак жүрөк" кризистик борборунун башчысы Дариха Асылбекова билдирди.

"Буга чейин анын тагдыры тууралуу жалпыга маалымдоо каражаттарына жарыяланган соӊ бир-эки киши жардам берген болчу. Андан бери Араван райондук сотко кайрылып, балдарына алимент төлөтүп берүүнү суранып жатабыз. Бирок райондук сот келиндин ишин канааттандыра элек. Анткени күйөөсү Орусиянын жараны экен, бул жакка келсе, анан сотко катыштырып, алимент кыркылып берилерин айтышты", - дейт Асылбекова.

Дариха Асылбекованын айтымында, учурда Наргиза Жолдошева шаардагы мекемелердин биринде пол жууп иштейт. Жууп, тазалоо иштерин 3 айлык баласын көтөрүп жүрүп аткарат. Жаш келиндин улуу баласы 2 жашта.

Эске салсак, буга чейин Жолдошева наристелерин балдар үйүнө таштап кетерин айтып кризистик борборго кайрылган.