Аюу айылынын тургуну: "Ата-энем, уулум, бир туугандарым жалпы 9 жакынымдан айрылып, кайгыга муунуп турам"

Өзгөндүн Аюу айылында 29-апрель күнү жер көчкү кырсыгы катталып, 24 адам жер алдында калды. Алардын ичинен 9 адам жергиликтүү тургун Шернияз Разабаевдин жакын туугандары. Жер көчкүнүн алдында калып жакын адамдарын жоготкон Разабаев бүгүн, 2-майда SUPER.KG порталына буларды айтып берди.

"Мен бүгүн дүйнөдө жалгыз калгандай кайгыга муунуп калдым. Атам менен апамды жоготтум. Бир тууган агам менен жеңемден айрылдым. Алардын эки кызы кошо көз жумду. Бир тууган карындашым менен баласы кайтыш болду. Ошондой эле 11-класста окуган уулумдан айрылдым. Агамдын артында жалгыз уулу калды. Ал Орусияда иштеп жүргөн. Кырсык болгондун эртеси күнү келди. Жер алдында калгандарды дагы издеп, болгон күч аракетти жумшашса дээр элем. Такыр эле табылбай калса анда айла жок жаназасын окуп, мүрзө кылып калтырууга макулмун", - деп билдирди Разабаев.

Маалыматка ылайык, каарманыбыздын маркум агасынын балдарынын бири 2 жаш, экинчиси 6-класстын окуучусу болгон. Бул күнү анын бир туугандары атасынын абалын сурап келишкен. Кырсык болордун алдында туугандар чогулуп эртең мененки чайды ичип олтурушкан.

"Атамдын 8 бодо малы жер алдында калды. Анысына кайгырган жокмун. Байлык, тамак-аш табылат. Жакындарымды бир учурда жоготуп, дүйнөм аңтарылып турат. Азыр да өзүмө келе албай башым туман болуп жөн эле ары-бери басып жүрөм. Буга чейин агамдын эки кызынын жансыз денеси табылды", - деп көзүнө жаш алды.