Өзгөндүн Аюу айылынын тургундары кайда көчүрүлөрү аныкталды

Өзгөн районунун Заргер айыл аймагынын Аюу айылынын тургундары кайда көчүрүлөрү аныкталды. Бул тууралуу SUPER.KG порталына Заргердин башчысы Динмухаммет Бокошов билдирди.

"Көчүрүү боюнча жер тилкелерин тактадык, кошуна Төрт-Көл айыл аймагында турак жай салууга ылайыктуу 42 гектар жер бар экен, трансформация үчүн документтерди Бишкектен күтүп жатабыз", - деди Бокошов.

"Көчкү түшкөн жерден мурда айылдын өйдө жагына жол өтчү. Бул жер эми мазар болуп кала турган болсо, жолду башка жактан өткөрүшүбүз керек болот. Эл менен сүйлөшүп ыңгайлуу тараптан жаңы жол салабыз. Бүгүн Өзгөн РЭСтен 8 электр мамысы келди, аларды орнотсо, электр энергиясы берилет. Аюунун тургундары азыр убактылуу чатырларда жашап жатат", - деп кошумчалады айыл аймагынын башчысы.

Эскерте кетсек, 29-апрель күнү саат 06:40 чамасында Өзгөндө 200 миң куб метр жер көчкү түшүп, натыйжада 7 турак үйдү басып калган. Алдын ала маалымат боюнча, болжол менен 6 үйдө 24 жаран көчкү алдында калып калышкан. Азыркы убакытка чейин 3 адамдын жансыз денелери табылган.