Президенттике талапкердин күрөөсүн 2 миллион сомго чейин көтөрүү сунушталууда

Парламентте президенттик шайлоого катыша турган талапкер 2 миллион сом күрөө төлөөсү сунушталууда. Бул тууралуу бүгүн, 2-майда "Президентти жана Жогорку Кеңештин депутаттарын шайлоо жөнүндө" Конституциялык мыйзамга өзгөртүүлөрдү киргизүү тууралуу" мыйзам долбоору боюнча парламенттик угууда белгилүү болду.

“Республика – Ата Журт” фракциясынын депутаты Мирлан Жээнчороев саясий партиялар үчүн 5 миллион сом каралганын айтты. Ал эми президенттикке талапкерлерге 2 миллион сом күрөөнү сунуштап жатышкандарын билдирди.

Коомдук ишмер Акжолтой Тукунов бул күрөөнүн көлөмү 100 миң сомдон эмнеге 1-2 миллион сомго чейин көтөрүлгөнүн сурады. "Кыргыз мамлекетинин экономикалык деңгээлинин өскөнүнөнбү же президенттикке талапкерлердин капчыгы көбөйгөндөнбү? Эмненин негизинде күрөө өсүп жатат? Бул бирөөнү таарынтып же кемсинтүү эмес", - деди Тукунов.

Мирлан Жээнчороев 30 миң жарандан кол топтогон талапкердин акча чогултууга мүмкүнчүлүгү бар экенин айтты. 2 миллион сомду 30 миң адамга бөлсөк 30 сомдун тегереги боло турганын билдирди. Анын айтымында, талапкердин колдоочулары 30 сом бере алат.

Ошол учурда КСДП фракциясынын лидери Иса Өмүркулов Тукуновго бул жөн гана сунуш экенин эскертип, ал дагы өзүнүн оюн айтса боло турганын билдирди.

Тукунов 500 миң сом күрөө коюу туура экенин билдирди.