Эдил Байсалов: "Elektromed Elektronik" эч качан Алмазбек Атамбаевдики болгон эмес"

"Elektromed Elektronik" ишканасы эч качан Алмазбек Атамбаевге таандык болгон эмес", - деп активист Эдил Байсалов бүгүн, 2-майда аталган компания тараткан билдирүүгө жооп берди.

"Мен "Elektromed Elektronik" ишканасынан билдирүүсүндө берген маалыматтарына далилдерди келтирүүнү талап кылам. Эскертип коёюн: мен Түркиядагы жана башка сотторго кайрылып, төгүндөөнү талап кылам", - деп эскертти активист.

"Компаниянын бүгүнкү билдирүүсү ызы-чуу эле салып, бирок чындыгында, менин айткандарымды төгүндөбөйт. "Eletkromed Elektronik" ишканасы эч качан Алмазбек Атамбаевге таандык болгон эмес. Ушуну биз баарыбыз билишибиз керек. Кызыгы, кантип 33 миллион долларга бааланган компания башка компанияны 35 миллион долларга ээлеп алды? Эмне үчүн? Мага кызыктуу болуп жатат, анткени өзүмдүн президентимдин акыркы 15 жыл бою жашырып келген ийгиликтери менен сыймыктангым келет. Каалаганды айта берсе болот. Мен бир гана суроолорду берип жатам жана расмий документтерге гана ишенем", - деди Байсалов.

Айта кетсек, бүгүн Түркиядагы "Elektromed Elektronik" ишканасы "2003-жылы Алмазбек Атамбаевге 35 миллион доллар төлөп бергенбиз" деп өзүнүн басма сөз кызматы аркылуу билдирүү тараткан.