Мамлекеттик каттоо кызматы: "Биометрикалык паспортту алууда паспорттон башка документ талап кылынбайт"

Электрондук биометрикалык паспортту алууда паспорттон башка эч кандай документ талап кылынбайт. Мындай маалыматты бүгүн, 2-майда SUPER.KG порталына Мамлекеттик каттоо кызматынын басма сөз кызматынан билдиришти.

"Эгерде өлкө жаранынын колунда 1994-жылдын жана 2004-жылдын үлгүсүндөгү паспорт болсо анда эч кандай документ талап кылынбайт. Биометрикалык маалыматта камтылган 19 маалыматты карап чыгып, жарандын колундагы паспортту биометрикалык паспортко алмаштырып беребиз. Эгерде паспорт алуучу 1974-жылкы үлгүдөгү паспорт менен келсе анда жарандыгын аныктоо аракети көрүлөт", - деп билдирди басма сөз кызматы.

Маалыматка ылайык, жаран өздүгүн аныктоочу документи жок келсе, тактап айтканда, жоготуп алса, анда:

Кыргыз Республикасынын жаранынын 2004-жылдын же 1994-жылдын үлгүсүндөгү паспортунун жоголгонуна байланыштуу:

- туулгандыгы тууралуу күбөлүк;

- арыз ээсинин жоголгон паспортунун ордуна 2017-жылдын үлгүсүндөгү паспорт берүү жөнүндө арызы талап кылынат.

Жоголгон паспорттун ордуна 2017-жылдын үлгүсүндөгү паспорт берүү жөнүндө арыз 5 күндүн ичинде каралат. Жоготуу жөнүндө ишти түзүү жана жүргүзүү тартибин ыйгарым укуктуу орган аныктайт.

Ал эми жаран 2017-жылдын үлгүсүндөгү биометрикалык паспортунун жоголгонуна байланыштуу:

- арыз ээсинин жоголгон паспортунун ордуна 2017-жылдын үлгүсүндөгү паспорт берүү жөнүндө арызы талап кылынат.

Эске салсак, өлкө аймагында биометрикалык паспорт 1-майдан тарта берилип башталары айтылган.