Аюу айылынын тургуну: "Туугандарыбызды кепиндеп көмө албай калабызбы?"

Бүгүн, 2-май күнү Аюу айылындагы көчкү алдында табылбай жаткан 23 жарандын жаназасы окулду. Жакындары көчкү алдында калгандар дин ишмерлеринин чечимин кандай кабыл алды деген суроо менен Аюунун тургундарына байланышып көрдүк.

“Менин эки бир тууганым үй-бүлөсү менен көчкү алдында калды. Сөөктөрү табылган жок. Муфтияттан, казыяттан келген молдокелер менен бирге жаназа намазын окудук. Эми сөздөр айтылды сөөктөрдү издебей токтотолу деп, бирок кантип эле ушул жайда калып калышат. Кепиндеп көмө албай калабызбы деген нерсе баары бир жүрөгүңдө кала берет экен”, - деди Аюу айылынын тургуну Үмөталы Коргонбаев.

Мухаммед Гадаев аттуу жергиликтүү тургун кырсыктан бир тууган жээнинен айрылган. Ал ӨКМдан казуу, издөө иштерине оңдуу техникалар келбегендигин айтат.

“Биринчи күнү эле бийликтегилер келгенде элдер техникалардын күчтүүрөөгүн жөнөткүлө деп айтканбыз. Бир экскаватор менен жүктөөчү техниканы алып келиптир, анысы топурак ылай болгондуктан тыгылып иштей алган жок. Экскаватору кечээ эле токтогон жүктөөчүсү бүгүн эртең менен баткактан жүрө албай токтоду. Эми чоңдор көрүп кетишкен ылай баткакта жүргөн техника бердиртсе, балким, издөө иштери оңой болот беле”, - дейт ал.

Жергиликтүү тургундардын айтымында, казуу жана издөө иштери жаназа окулганына карабай токтотула элек. Иш токтотулгандыгы тууралуу расмий маалыматты ӨКМ да бере элек.