"Айгүл гүлүнүн кооздугуна суктанып, гүлдөрдү үзгөм. Жулбаш керек деген ой такыр келген эмес" дейт интернетте талкууга алынган Динара Калбекова

Учурда социалдык тармактарда Баткенде өсүп, сейрек кездешчү айгүл гүлүн үзүп, аны менен сүрөткө түшкөн Динара Калбекова кызуу талкууга алынууда. Ал SUPER.KG`ге сүрөт 2013-жылдын 1-майында тартылганын айтып, буларды билдирди:

"Өз көйгөйлөрүм менен алектенип, талкууларга көӊүл бурганга убакыт деле болгон жок. Болгон окуяны мындайча эле түшүндүрүп берем. Ал сүрөттүн тартылганына, Одноклассники социалдык тармагына жүктөлгөнүнө да көп жыл болду. Ооба, туура, гүлдү биз жулуп, көтөрүп алганым ырас. Ал гүлдү биринчи жолу көргөм, жулбаш керек деген ой такыр келген эмес. Кооздугуна суктанып, жулуп түшкөнбүз. Айгүл гүлү тууралуу маалыматым бар болчу. Ал убакта гүлдү коруган кишини көргөн эмесин", - дейт Динара Калбекова.

Динара Калбекова Баткенге келин болорун, сүрөткө жакындары менен түшкөнүн кошумчалады.