Жер көчкүлөрдү алдын алуу үчүн үч жылда өлкөдө 510 миңге чукул көчөт отургузулду

Бүгүнкү күндө жер көчкүнү жана селдин жүрүшүн алдын алуу максатында кооптуу тилкелерге көчөт отургузулууда. Бул тууралуу Өзгөчө кырдаалдар министрлиги билдирди.

Көчөттөр “Жашыл долбоор” долбоорунун алкагында отургузулуп жатат. Маалыматка ылайык, 2014-жылдан 2017-жылга чейин өлкө боюнча, өзгөчө кооптуу делген 117 тилкеге, жалпы аянты 1073,76 гектар жерге 633 440 даана көчөт отургузуу пландалган.

"Ал эми бүгүнкү күндө өлкө боюнча 510 миңге чукул көчөт отургузулуп, кооптуу делген 217 тилкеге, 791 миң гектар жерге урук себилген. Бул иштердин жыйынтыгында 7306 турак үй, 817 гектар жер, 22 мектеп, 3 социалдык объект, 3 бала бакча, 1 спорт зал, 4 көпүрө, 2 мечит, 4 ФАП корголуусу пландалып жатат", - деп билдиришкен министрликтен.

Ошондой эле кооптуу аймактарга отургузулган көчөттөр атайын терең тамыр алуучу, мөмөлүү дарактардын түрлөрүнөн тандалып алынганын жана дарак отургузуунун үч өзгөчөлүгү бар экендиги белгиленет:

- жаратылыш кырсыктарынан сактайт;
- өлкөнү жашылдандыруу иши жүрөт;
- көчөт отургузулган аймактагы элдер анын мөмөсүн пайдалана алат.