Бишкекте балдар аянтчасынын кооптуу жерге салынганы тургундарды кабатыр кылууда

Бишкекте көчөлөрдүн кесилишинин жанына курулган балдар аянтчасы жергиликтүү тургундарды кабатыр кылууда. Бул тууралуу бүгүн, 5-майда SUPER.KG порталына шаар тургуну Нургүл Пирматова билдирди.

Маалыматка ылайык, балдардын ойноочу аянтчасы борбор калаанын Тыналиев жана Гагарин көчөсүнүн кесилишине орнотулган. Жергиликтүү тургундар жол кырсыгынан кооптонушууда.

"Бул жолдон дайыма өтөм. Мен өзүм энемин. Бул орнотулган балдардын аянты өспүрүмдөрдүн өмүрүнө кооптуу. Анткени жолго өтө эле жакын. Жолдон өтүп бараткан ар бир баланын кызыгуусу артып, жол чыракка карабай өтүп, оюнга азгырылышы мүмкүн. Анткени балдардын аң сезими кырсык тооруп кетерине жетпейт. Энелердин көз жашы агуусун каалабайм. Тез аранын ичинде курулган аянтты алып таштоо зарыл. Бул аракетибиз менен адам өмүрүн алдын алган болобуз", - деп билдирди Пирматова.