Бейтап: "Мамакеев атындагы хирургия борборунун дарыгерлери "эс алуу күн" деп кабыл албай жатышат"

5-майда SUPER.KG порталына бейтап Жумакан Толтобаева кайрылып аны М.Мамакеев атындагы хирургия борборунун дарыгерлери кабыл албай жатышканын айтты.

"Кечээ "Тез жардам" менен панкреатит оорум козголуп ооруканага келгенде кабыл алышкан. Бүгүн такси менен келсем нөөмөттөгү дарыгерлер "эс алуу күн" деп кабыл албай жатышат. Эмне, сөзсүз өлөйүн деп келгенде кабыл алыш керекпи? Фучик көчөсүндөгү ооруканага баргыла деп жатат", - дейт Жумакан Толтобаева.

Аталган борбордун кабылдамасынан бейтап келгенин ырастап, кабыл алынбашынын себептерин түшүндүрүштү.

"Биз эс алуу күнү деген эмеспиз. Негизи дүйшөмбү жана жума күндөрү бейтаптарды кабыл албайбыз. Ооруканада тазалоо иштери жүргүзүлөт. Саламаттыкты сактоо министрлигинен бул боюнча атайын чечим чыккан. Келген бейтаптарга кабыл албай турган күн экенин түшүндүрүп, башка ооруканага барышын айттык. Бирок бизди укпай коюшту", - деп билдиришти оорукананын кабылдамасынан.